Ապրիլի 12-ից 14-ը Ամերիկայի Միացյալ Նահանգներում կայացել են Համաշխարհային Բանկի խմբի և Արժույթի միջազգային հիմնադրամի Կառավարիչների խորհրդի 2019 թվականի գարնանային հանդիպումները, որոնց մասնակցել է նաև ՀՀ ֆինանսների նախարարի տեղակալ Արմեն Հայրապետյանը: Արմեն Հայրապետյանը հանդիսանում է ԱՄՀ-ի և ՀԲ-ի կառավարիչների խորհուրդներում Հայաստանի Հանրապետության փոխկառավարիչը:
Գարնանային հանդիպումները հնարավորություն են տալիս բարձրաստիճան հարթակում քննարկումներ ծավալել այնպիսի կարևոր ոլորտների շուրջ, ինչպիսիք են՝ համաշխարհային տնտեսությունը, միջազգային տնտեսական իրավիճակի զարգացումները, համաշխարհային ֆինանսական շուկաները, համաշխարհային ֆինանսական կայունությունը. զարգացող երկրներում աղքատության նվազեցումը և այլն:
Տեղի են ունեցել հանդիպումներ ԱՄՀ հոլանդա-բելգիական և ՀԲ հոլանդական ընկերակցային խմբի երկրների ֆինանսների նախարարությունների, մի շարք միջազգային ներդրումային բանկերի և ֆինանսական կառույցների ներկայացուցիչների հետ՝ փոխշահավետ համագործակցության շարունակականությունն ապահովելու նպատակով:
ՀԲ խմբի և ԱՄՀ Կառավարիչների խորհրդի 2019 թվականի գարնանային հանդիպումների շրջանակներում ապրիլի 9-ին և 10-ին կայացել է Մարդկային կապիտալի զարգացմանը նվիրված գագաթնաժողով, որի նպատակն է գնահատել երկրներում սոցիալական ոլորտում առկա իրավիճակը և այն ուղիները, որոնք հնարավորություն կտան բարելավելու մարդկային կապիտալի ինդեքսը: