Մայիսի 7-ին ՀՀ ֆինանսների նախարար Ատոմ Ջանջուղազյանն ընդունել է Հայաստանի Հանրապետությունում Միավորված ազգերի կազմակերպության (ՄԱԿ) մշտական համակարգող Շոմբի Շարփին։
Հանդիպման ընթացքում կողմերն անդրադարձել են առկա համագործակցության ընդլայնման հեռանկարներին: Ատոմ Ջանջուղազյանն ընդգծել է, որ համատեղ ծրագրերը պետք է լինեն հասցեական, իրատեսական և շոշափելի արդյունքներ գրանցեն տնտեսության մեջ: Ըստ նրա` պետք է կատարվեն համապատասխան ոլորտային ուսումնասիրություններ և իրականացվեն կանխատեսելի վարքագիծ ունենող ծրագրերը:
Շոմբի Շարփին կարևորել է ֆինանսների նախարարության դերակատարումն այս գործընթացում և տեղեկացրել, որ Հայաստանում ՄԱԿ-ի գրասենյակը կհամալրվի համապատասխան մասնագետներով` առավել արդյունավետ և մասնագիտական գործունեություն ծավալելու նպատակով: Նա նշել է, որ շուտով կմեկնարկի հաջորդ տարիների համագործակցության շրջանակի` ՄԱԿ-ի զարգացման աջակցության ծրագրի մշակման գործընթացը, և փորձագետների մակարդակով երկկողմ հանդիպումներն ու քննարկումները կնպաստեն փոխշահավետ պայմաններով ծրագրի նախապատրաստմանը: