Մայիսի 30-ին ԱԺ հանձնաժողովների համատեղ նիստում շարունակվել է «Հայաստանի Հանրապետության 2017թ. պետական բյուջեի կատարման մասին» տարեկան հաշվետվության քննարկումը:
Ըստ ֆինանսների նախարար Ատոմ Ջանջուղազյանի՝ 2017 թվականի բյուջեի ճշտված եկամտային մասը կազմել է 1 տրլն 320,9 մլրդ դրամ, որտեղ մեծ տեսակարար կշիռ են ունեցել հարկային եկամուտները և պետական տուրքերը՝ ավելի քան 91,2 տոկոս: Նրա խոսքով՝ 1,6 տոկոսով ավելացել է հարկային եկամուտների կշիռը և կազմել 1 տրլն 158 մլրդ դրամ, իսկ ճշտված ցուցանիշը կազմել է 1 տրլն 205 մլրդ դրամ:
2017 թվականին ՀՀ տնտեսական զարգացման և ներդրումների նախարարության համար նախատեսվել է 22 ծրագիր. փաստացի բյուջեն կազմել է 2,8 մլրդ դրամ, իսկ ճշտված կատարողականը՝ շուրջ 96,45 տոկոս: Հայաստանի զարգացման հիմնադրամի կանոնադրական խնդիրների համար նախատեսված գումարը օգտագործվել է 94 տոկոսով կամ եղել է 349 մլն դրամ:
Էներգետիկ ենթակառուցվածքների և բնական պաշարների նախարարության կողմից իրականացվող հիմնական ծրագրերը եղել են արտաքին աջակցությամբ իրականացվող ծրագրեր: Ընդհանուր առմամբ նախարարության կողմից 2017 թվականին օգտագործվել է 10,3 մլրդ դրամ, որը կազմել է ճշտված ծրագրի 74,54 տոկոսը, մասնավորապես, 9,4 մլրդ դրամ կամ ճշտված ծրագրի 72,8 տոկոսը օգտագործվել է արտաքին աջակցությամբ իրանացվող ծրագրերի շրջանակներում:
«Տրանսպորտի, կապի և տեղեկատվական տեխնոլոգիաների նախարարության կողմից 2017 թ-ին նախատեսվել էր 26.8 մլրդ դրամ, սակայն տարվա ընթացքում, ըստ նախարության կարիքների, ճշտված ծրագրով կազմել է 64 մլրդ դրամ: Ճշտումը պայմանավորված է եղել բացառապես արտաքին աջակցությամբ իրականացվող ծրագրերի գործոնով. արդյունքում՝ օգտագործումը կազմել է 55,5 մլրդ դրամ կամ 86,42 տոկոս»,-ասել է ֆինանսների նախարարը:
ՀՀ հանրային ծառայությունները կարգավորող հանձնաժողովի համար նախատեսվել է շուրջ 807,6 մլն դրամ, որի դիմաց կատարողականը կազմել է շուրջ 96 տոկոս կամ օգտագործվել է 774,3 մլն դրամ:
ՀՀ տնտեսական մրցակցության պաշտպանության պետական հանձնաժողովի բյուջեն հաշվետու տարում կազմել է 314,2 մլն դրամ կամ իրականացվել է ծրագրային ցուցանիշի 98,95 տոկոսը:
ՀՀ կառավարությանն առընթեր անշարժ գույքի կադաստրի պետական կոմիտեի համար նախատեսված միջոցներն օգտագործվել են 87,11 տոկոսով կամ շուրջ 3,5 մլրդ դրամ:
ՀՀ կառավարությանն առընթեր քաղաքաշինության պետական կոմիտեի ծրագրային ցուցանիշը ճշտվել է տարվա ընթացքում. նախատեսված 3,8 մլրդ դրամը ճշտված պլանով դարձել է 7,7 մլրդ դրամ, որի դիմաց արձանագրվել է 99,51 տոկոս:
«ՀՀ ԷԵԲՊՆ ջրային տնտեսության պետական կոմիտեի բյուջեով ի սկզբանե նախատեսված է եղել 19,1 մլրդ դրամ, սակայն ճշտված պլանով կազմել է 38,3 մլրդ դրամ, և վերջինիս դիմաց արձանագրվել է շուրջ 87,9 տոկոս կատարողական կամ օգտագործվել է 33,7 մլրդ դրամ»,- նշել է ֆինանսների նախարար Ատոմ Ջանջուղազյանը:
Քննարկման ընթացքում ներկայացված ոլորտների պատասխանատուները նույնպես անդրադարձել են կատարված ծրագրերին և արձանագրված կատարողականներին, որին հաջորդել է հարցուպատասխանը:
