ԹԵԺ ԳԻԾ
ՀՀ ֆինանսների նախարար Վարդան Արամյանի ամանորյա ուղերձը
29.12.2017
ՀՀ ֆինանսների նախարար Վարդան Արամյանի ամանորյա ուղերձը

Սիրելի՛ հայրենակիցներ, 

Շնորհավորում եմ Ամանորի և Սուրբ Ծննդյան տոների առթիվ:

2017 թվականը աշխատանքի, արարելու և վերականգնողական տարի էր:

Մեր տնտեսությունը աստիճանաբար ոտքի է կանգնում, կայուն տնտեսական աճը մեզ հնարավորություն  է տալիս լրացուցիչ ֆինանսական միջոցներն ուղղել մեր քաղաքացիների կենսական պայմանների բարելավմանը և պետության սահմանների պաշտպանությանը:

Բարեկեցիկ հասարակություն մեկ-երկու տարում չի ստեղծվում. հաջողությունը հաջողությանը գումարելով, իրար օգնելով և ոչ թե խանգարելով, քայլ առ քայլ միայն հնարավոր կլինի Հայաստանում ձևավորել արդար խաղի կանոններով մրցունակ տնտեսություն:

Կառավարության ճիշտ տնտեսական քաղաքականության շնորհիվ 2017-ին մենք ձեռքբերումներ ենք ունեցել նաև միջազգային հարթակներում: Ուրվագծել ենք նոր համագործակցության եզրեր ֆինանսական և տնտեսական ոլորտներում, որոնք վստահաբար կնպաստեն մեր առջև դրված գերակա խնդիրների լուծմանը:

Անցնող տարին մենք ճանապարհում ենք բազմաթիվ ոլորտներում հուսադրող նախադրյալներով, բայց նաև գոյություն ունեցող խնդիրների ողջ գիտակցմամբ: Համոզված եմ, որ Հայաստանի տնտեսական ուղեգիծը ճիշտ է։

Մաղթում եմ խաղաղություն,  առողջություն և ընտանեկան բարօրություն: