ՀՀ Ազգային ժողովում մշտական հանձնաժողովների համատեղ նիստերում շարունակվում են 2019 թվականի պետական բյուջեի տարեկան հաշվետվության նախնական քննարկումները։
Հունիսի 10-ին ԱԺ տարածքային կառավարման և տեղական ինքնակառավարման, գյուղատնտեսության և բնապահպանության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում ներկայացվել է «ՀՀ 2019թ. պետական բյուջեի կատարման մասին» տարեկան հաշվետվությունը, որը վերաբերել է տարածքային կառավարման մարմինների, մասնավորապես, մարզպետարանների եկամուտներին ու ծախսերին։
Ներկայացվել է նաև էկոնոմիկայի, գյուղատնտեսական ոլորտների բյուջեի կատարողականը։
Մասնավորապես, ՀՀ ֆինանսների նախարար Ատոմ Ջանջուղազյանը ներկայացնելով գյուղատնտեսության ոլորտի կատարողականը, պատգամավորներին տեղեկացրել է, որ 2019-ին ՀՀ պետական բյուջեով այդ ոլորտին հատկացվել է 12․8 մլրդ դրամ։
Ընդհանուր թվով 8 բյուջետային ծրագրի 51 միջոցառումներ են իրականացվել գյուղատնտեսության ոլորտում։ Կատարողականը կազմել է շուրջ 64 տոկոս։ Ինչ վերաբերում է բնապահպանական ոլորտին, ապա Ատոմ Ջանջուղազյանը ներկայացրեց, որ Շրջակա միջավայրի նախարարությանը հաշվետու տարում հատկացվել է 7․3 մլրդ դրամ, բայց փաստացի օգտագործվել է 5․56 մլրդ դրամը։
Ֆինանսների նախարարը պատասխանել է պատգամավորների հարցերին, այնուհետև յուրաքանչյուր ոլորտի պատասխանատուները ներկայացրել են բյուջեի եկամտային և ծախսային մասը։