ԹԵԺ ԳԻԾ
20.01.2020
Լինել թափանցիկ ու վստահելի. իշխանությունը որոշել է` ինչպես ծախսել բյուջեն մինչև 2023թ.–ը

ՀՀ կառավարությունը մշակել է «Պետական ֆինանսների կառավարման համակարգի 2019-2023թթ–ի բարեփոխումների ռազմավարությունը»։ Դրանով խոստանում է պետական ծախսերը դարձնել արդյունավետ, թափանցիկ ու հանրության համար վստահելի։ 

Արտաքին պարտքը կնվազի, ներքինը կավելանա։ Կառավարությունը մտադիր է մինչև 2023թ.–ը վերանայել ՀՀ պարտքի կառուցվածքը։ Նման ուղենիշ է դրվել «Պետական ֆինանսների կառավարման համակարգի՝ 2019-2023թթ–ի բարեփոխումների ռազմավարության» մեջ, որն այսօր ներկայացվել էր հանրային քննարկման։

Միջոցառման ընդմիջմանը լրագրողների հետ զրույցում մեկնաբանելով հիշյալ դրույթը՝ ՀՀ ֆինանսների նախարար Ատոմ Ջանջուղազյանը մանրամասնեց, որ ՀՀ պետական բյուջեի դեֆիցիտի ֆինանսավորման աղբյուրների մեջ գնալով մեծացվելու է ներքին աղբյուրների ծավալը` զուգահեռաբար նվազեցնելով արտաքին աղբյուրներից վերցվող պարտքերը։

«Արդյունքում մեզ մոտ կարող է սկսել ավելի արագ աճել ներքին պարտքը կամ դրամով արտահայտված պարտքը: Դա մեզ հնարավորություն կտա մեղմել փոխարժեքի ռիսկը, որը մեր հիմնական ռիսկերից մեկն է։ Նախանշված ուղիներից է նաև այն, որ մենք փորձենք հնարավորինս ձեռնպահ մնալ լողացող փոխարժեքով և լողացող տոկոսադրույքով պարտքերի ներգրավումից, ինչը նույնպես մեր ռազմավարական ռիսկերից է»,– ասաց ֆինանսների նախարարը։

Ռազմավարությունը նախատեսում է նաև մինչև 2023թ.–ը տնտեսության մեջ առկա ստվերը կրճատել 20-25 տոկոսով։ Ատոմ Ջանջուղազյանը հստակեցրեց, որ այդ ուղենիշի համար հիմք է ընդունվել Ազգային վիճակագրական կոմիտեի ցուցանիշը, որի համաձայն` ՀՀ տնտեսության 20-25 տոկոսն այսօր ստվերում է։

Նոր եռամյա ռազմավարությունը նախատեսում է նաև պետական գնումների համակարգի վերափոխում։ Ռազմավարության հեղինակները հավակնում են մինչև 2023թ.–ը Հայաստանում ներդնել աշխարհում լավագույն էլեկտրոնային համակարգը։

«Ես հայտարարեցի մեր հավակնության մասին` ունենալ աշխարհում լավագույն էլեկտրոնային գնումների համակարգը, բայց այն առայժմ ո՛չ հայկական, ո՛չ էլ ոչ հայկական ընկերության կողմից չի մշակվում, որովհետև առայժմ ձևակերպված չէ որպես տեխնիկական առաջադրանք»,– պարզաբանեց Ջանջուղազյանը` այդուհանդերձ հույս հայտնելով, որ ի վերջո կստեղծվի մի համակարգ, որում կարտացոլվեն ՀՀ բոլոր իրավակարգավորումներն ու որը հնարավորություն կտա կառավարել բոլոր հնարավոր ռիսկերը։

Ինչպես քննարկման ընթացքում լրագրողների հետ հարցուպատասխանի ժամանակ ասաց ՀՀ փոխվարչապետ Մհեր Գրիգորյանը, աշխարհում լավագույն այս համակարգով ՀՀ կառավարությունը հույս ունի բարձրացնել պետական գնումների ու պետական ծախսերի թափանցիկությունն ու դրանց նկատմամբ հանրության վստահությունը։

«Հանրությունը հնարավորություն կունենա ստանալ բոլոր հարցերի լիարժեք պատասխանն ու գնահատականը։ Բայց կա երկրորդ շատ կարևոր նպատակը` ինչքան որ ավելի հրապարակային ու թափանցիկ են ծախսերը, ինչքան բարձր է հաշվետվողականությունը, այնքան փորձագիտական հանրությունն ավելի ներգրավված է լինում և ասելիքները շատ ավելի կոնկրետ են լինում, ինչն ի վերջո դրական ազդեցություն է ունենում ծախսի վերջնական նպատակին հասնելու համար»,– ասաց Գրիգորյանը։

Կառավարության ծախսած հանրային միջոցների նկատմամբ հանրության վստահությունը շահելու համար այս ամենից զատ ՀՀ փոխվարչապետը կարևորում է նաև սոցիալական ծախսերի ավելացման անհրաժեշտությունը։

Լրագրողների հիշեցմանը, թե հանրությունը միանշանակ չի ընդունում հատկապես պետական համակարգի պարգևավճարների ու հավելավճարների չափերը, Մհեր Գրիգորյանն արձագանքեց, որ հանրության վստահությունը շահելու ու ծախսերի արդյունավետությունը բարձրացնելու համար շատ կարևոր է, որ կրթական, սոցիալական ծախսերը համահունչ լինեն պետական ապարատի վրա կատարվող ծախսերի հետ։ 

Աղբյուրը՝ ArmeniaSputnik.am