ՀՀ ֆինանսների նախարարության ներկայացուցիչները նախարարի առաջին տեղակալ Կարեն Բրուտյանի գլխավորությամբ մասնակցել են «Հայկական բիզնես կոալիցիա»-ի և «Իրավաբանների հայկական ասոցիացիա»-ի նախաձեռնությամբ կազմակերպված «Բիզնեսի և քաղաքացիական հասարակության ներկայացուցիչների մասնակցությունը գնումների ոլորտի օրենսդրության բարեփոխումների իրականացմանը» քննարկմանը:
Միջոցառումն իրականացվել է «Կառուցողական երկխոսության հանձնառություն» ծրագրի հիմնական ուղղություններից մեկի՝ պետական գնումների ոլորտի օրենսդրության բացերի ախտորոշման և փոփոխությունների քննարկման նպատակով:
Կարեն Բրուտյանը նշել է, որ օրենսդրական բարեփոխումների նպատակով անցկացվում են հանդիպումներ հասարակական և բիզնես հատվածի ներկայացուցիչների հետ, որոնց արդյունքում ակնկալվում է ախտորոշել և բարձրաձայնել բոլոր խնդիրները:
Քննարկվել են նաև ոլորտի երթաօրենսդրական ակտերի փոփոխությունները, որոնց միջոցով, ըստ Կարեն Բրուտյանի, նախատեսվում է հանել ձևական պահանջները և չծանրաբեռնել գնումների գործընթացի մասնակիցներին՝ հաշվի առնելով, որ այդ պահանջները վերջնարդյունքի վրա չեն ազդում:
«Գնումների բովանդակությունը պետք է լինի այնպիսին, որ դեռևս բյուջետային քննարկումների փուլում գերատեսչությունները հանրությանը ներկայացնեն իրենց կարիքները՝ հիմնավորելով դրանց նպատակը: Գնումների գործընթացը ամենառիսկային ոլորտներից մեկն է, ուստի այստեղ ամենակարևորը հրապարակայնության և հաշվետվողականության ապահովումն է, որը պետք է իրականացվի քաղհասարակության անմիջական մասնակցությամբ», - ասել է Բրուտյանը:
«Իրավաբանների հայկական ասոցիացիա» ՀԿ-ի նախագահ Կարեն Զադոյանը նկատել է, որ բիզնեսի և քաղհասարակության ներկայացուցիչները միշտ արձագանքել են օրենսդրական փոփոխություններին՝ խաղի հիմնական կանոնների սահմանումից հետո: Սա բացառիկ հնարավորություն է մասնակցել հիմնական խնդիրների լուծմանը նախնական փուլում:
Քննարկման ավարտին մասնագետները պատասխանել են ՀԿ ներկայացուցիչների ոլորտային հարցերին և պայմանավորվածություն է ձեռք բերվել, որ ՀԿ ներկայացուցիչները օրենսդրական փոփոխությունների վերաբերյալ իրենց առաջարկությունները ներկայացնեն ֆինանսների նախարարություն: