Հունիսի 18-ին ՀՀ ֆինանսների նախարարությունում նախարարի առաջին տեղակալ Կարեն Բրուտյանը հանդիպել է «Հայաստանի շինարարների միություն» հասարակական կազմակերպության ներկայացուցիչների հետ:
Նախարարի առաջին տեղակալը կարևորել է ՀԿ-ների մասնակցությունը գնումների բնագավառում նախատեսվող բարեփոխումներին:
Կարեն Բրուտյանի խոսքով՝ բացի միջազգային լավագույն փորձին համապատասխանությունից մեր օրենսդրությունը պետք է համարժեք լինի մեր իրականությանը: «Պետությունը՝ որպես գնորդ, նախ լուծում է իր հիմնական խնդիրը՝ ստեղծել արժեք փողի դիմաց, մյուս կողմից ապահովում է անհրաժեշտ մրցակցությունը և մրցույթի մասնակիցների վստահությունն իր հանդեպ»- ասել է նախարարի առաջին տեղակալը:
Բրուտյանն ընդգծել է, որ տարբեր շահագրգիռ կողմերի հետ հանրային քննարկումների միջոցով հասկանալով առկա խնդիրները՝ փոփոխություններ կկատարվեն գնումների ոլորտը կարգավորող օրենսդրության մեջ:
«Հայաստանի շինարարների միություն» հասարակական կազմակերպության ներկայացուցիչները ներկայացրել են գնումների գործընթացի կազմակերպման շրջանակներում իրենց հուզող խնդիրները: Քննարկվել են շինարարության ոլորտի նախագծերի գնահատման ստանդարտներին, որակավորման պահանջներին, գնագոյացման որոշումներին, տեխնիկական բնութագրերին առնչվող և այլ հարցեր:
Պայմանավորվածություն է ձեռք բերվել, որ ՀԿ ներկայացուցիչներն ամբողջացնեն իրենց առաջարկները նախատեսվող փոփոխությունների վերաբերյալ և ներկայացնեն ֆինանսների նախարարություն: