Նոյեմբերի 6-ին շարունակվել են բյուջետային քննարկումները ԱԺ եվրոպական ինտեգրման, ֆինանսավարկային և բյուջետային հարցերի մշտական հանձնաժողովների, ինչպես նաև ՀՀ Ազգային ժողովի պաշտպանության և անվտանգության հարցերի, ֆինանսավարկային և բյուջետային հարցերի մշտական հանձնաժողովների համատեղ նիստերում:
Ներկայացնելով «ՀՀ 2019 թվականի բյուջեի մասին» ՀՀ օրենքի նախագիծը՝ ՀՀ ֆինանսների նախարարի պաշտոնակատար Ատոմ Ջանջուղազյանը նշել է, որ գալիք տարվա եվրոպական ինտեգրման ոլորտին ուղղված որոշ ծրագրեր իրականացնելու համար նախատեսվում է ԵՄ-ից ստանալ 16 մլն եվրո գումարի չափով բյուջետային աջակցության դրամաշնորհ:
Ատոմ Ջանջուղազյանը ներակայացրել է նաև 2019թ. պետական բյուջեի նախագծում արտակարգ իրավիճակների, ոստիկանության, ազգային անվտանգության ծառայության համար նախատեսված եկամուտները և ծախսերը: Ըստ նրա՝ 2019 թվականին ՀՀ արտակարգ իրավիճակների նախարարության համար կանխատեսվող բյուջեի մեծությունը շուրջ 12, 6 մլրդ դրամ է:
Ոստիկանության ծախսերի համար նախատեսված է 61, 9 մլրդ դրամ, որն իր մեջ ներառում է նաև արտաբյուջետային հաշիվներով շրջանառությունը, իսկ ազգային անվտանգության ծառայության կանխատեսվող բյուջեի մեծությունը կազմում է 32,7 մլրդ դրամ։
«Ներկայացվող նախագծի առանձնահատկությունն այն է, որ մոտավորապես 30 տոկոսի է հասցված խրախուսման, պարգևատրումների ֆոնդը» -ընդգծել է ֆինանսների նախարարի պաշտոնակատարը:
Պաշտպանության նախարարությանն ու պետական ռեզերվներին վերաբերող բյուջետային քննարկումները տեղի են ունեցել դռնփակ: