ՀՀ ֆինանսների նախարարությունը և Cbonds տեղեկատվական գործակալությունը ստորագրել են համագործակցության վերաբերյալ համաձայնագիր, որը նախատեսում է ՀՀ պետական պարտատոմսերի թողարկումների, ինչպես նաև պարտատոմսերի տեղաբաշխման աճուրդների չափանիշների և արդյունքների վերաբերյալ տեղեկատվության փոխանակում:
ՀՀ ֆինանսների նախարարությունը վերլուծական և տեղեկատվական նյութեր կտեղադրի Cbonds Pages իր անհատական էջում:
Cbonds ընկերության գլխավոր տնօրեն Սերգեյ Լյալինն ընդգծել է. «Մեզ համար չափազանց կարևոր է կայքից օգտվողներին իրական և ճշգրիտ տեղեկատվության տրամադրումը: ՀՀ ֆինանսների նախարարության և Cbonds-ի միջև համագործակցությունը հնարավորություն կտա ապահովել Հայաստանի պետական պարտատոմսերի վերաբերյալ առավելագույնս հավաստի տվյալներ: Հուսով ենք, որ այն կբարձրացնի Ռուսաստանից և այլ երկրներից ներդրողների հետաքրքրությունը տվյալ շուկայի նկատմամբ»:
ՀՀ ֆինանսների նախարարության գլխավոր քարտուղարի պաշտոնակատար Վազգեն Հարությունյանն իր հերթին նշել է. «Cbonds կայքը համարվում է պարտատոմսերի շուկայի գլոբալ տեղեկատվական խոշորագույն ռեսուրսներից մեկը: ՀՀ ֆինանսների նախարարության և Cbonds-ի միջև համագործակցությունը միտված է ներդրողների բազայի ընդլայնմանը, ինչպես նաև պարտքի կառավարման հրապարակայնության, թափանցիկության և տեղեկատվության հասանելության ապահովման մեր ռազմավարական սկզբունքի իրագործմանը»:
Այս պահի դրությամբ կայքում հասանելի են հայկական թողարկողների ավելի քան 500 թողարկումներ, որոնցից շրջանառության մեջ են գտնվում 96 թողարկումներ 608.13 մլրդ ՀՀ դրամ ընդհանուր ծավալով:
