ՀՀ ֆինանսների նախարար Վահե Հովհաննիսյանը մասնակցել է Հայաստանի պետական ծախսերի և ֆինանսական հաշվետվողականության (ՊԾՖՀ/PEFA) 2023թ. գնահատման արդյունքների վերաբերյալ հրավիրված քննարկմանը:
Պետական ծախսերի և ֆինանսական հաշվետվողականության գնահատմամբ ապահովվում է պետական ֆինանսական կառավարման ուժեղ և թույլ կողմերի գնահատման, զեկուցման, ինչպես նաև դրանց կատարողականի չափման շրջանակը: ՊԾՖՀ-ն հիմնականում օգտագործվում է Եվրոպական միության կողմից բյուջետային աջակցության տրամադրման չափանիշները գնահատելու համար:
Հաշվի առնելով, որ Հայաստանում ՊԾՖՀ վերջին գնահատումը կատարվել է 2013 թվականին, Եվրոպական միությունը, Ասիական զարգացման բանկի հետ համատեղ 2023 թվականին ֆինանսավորել է նոր գնահատման իրականացումը:
Սույն գնահատման նախնական արդյունքները նոյեմբերի 23-ին ներկայացվել են դոնոր գործընկերներին և կառավարության պաշտոնյաներին: Ընդհանուր առմամբ, գնահատումը եզրակացնում է, որ Հայաստանում ՀՖԿ համակարգը շարունակում է մնալ լավ կայացած՝ արդյունավետ գործող ինստիտուտներով և պատասխանատվություններով: ՊԾՖՀ արդյունքները նաև կնպաստեն Հայաստանում ՀՖԿ համակարգում հետագա բարեփոխումների գործընթացի իրականացման հարցում: